去的士高溝女，玩家嘅獵物通常都係一啲年輕貌美嘅索女，好少有人會向中女埋手。喺咁嘅情況下，蘇州就有班中女搞咗個情慾派對，入場嘅女士唔單止係清一色衣着火辣同玩得勁癲嘅中女，更只係招待男士入場喪玩！
正所謂「十八歲，卜卜脆」，女人梗係嫩口先至夠吸引，就喺型男掛住溝後生索女嘅情況下，搞到一班中女冇啖好食。為咗可以滿足佢哋嘅需要，最近蘇州就有間會所舉辦咗一個專為中女而設嘅派對，既可杜絕靚妹入場爭食，同時又可提升佢哋嘅溝仔機會。唔好以為呢班中女玩得唔夠放，而情況恰好相反，佢哋唔單止玩得夠放，仲激到上台跳脫衣舞助興，展現中女嘅魅力。
據派對嘅負責人表示，佢哋個派對係行會員制，而會員全部都係中女，目的就係可以限制年齡。至於男士方面，則開放畀公眾參與，只要有興趣，都可以入去同班中女勁玩。可能有人認為，中女點計都唔及得靚妹吸引。不過負責人卻唔係咁睇，反而認為中女既有女人味，而佢哋嘅會員都有一定經濟基礎，故此仍然極具吸引力，最重要就係呢班中女，唔似得啲o靚妹咁膚淺之餘，玩得比o靚妹有過之而無不及！
原來呢班中女喺派對度，除咗夠主動埋男玩家身之外，仲會拉心水男士上台跳貼身熱舞。對男士嚟講，可以同火辣中女有肌膚接觸，固然覺得勁興奮，而對中女嚟講原來仲有另一重意義，就係同眾姊妹表示呢個男人係佢嘅，大家千祈唔好對佢落手，咁就唔會惹嚟無謂嘅爭拗啦！有去過嘅玩家表示，如果大家情投意合嘅話，梗係可以有下文，但通常第一次都唔會有嘢食，事關呢啲派對嘅中女，通常都係玩長線。如果想溝到女嘅話，就要去多幾次先得。
撰文：阿豪