夏日陽光普照，正係談情說愛嘅好日子，特別係啲懷春少女，個個都蓄勢以待，等候着自己嘅白馬王子出現。喺面相學上，有啲男仔係會對女朋友特別仆心仆命，當你公主咁照顧，遇到啲咁好嘅男仔，記住咪放過佢呀！
撰文：小德
好男仔嘅第一個特徵，就係要笑不露齒，呢種人不愛講多餘嘅說話，覺得行動最實際，戀愛期間會全心全意咁照顧自己心儀嘅女仔，你要佢去東，佢一定唔會去西，絕對係忠心又誠實嘅好男仔。
第二個特徵就係要留意吓佢嘅唇，唇要飽滿有肉，唇紋要清晰，原來呢種男仔會特別重感情，雖然說話唔多，但會一針見血，例如同女伴表白便會單刀直入，唔會帶你遊花園或者要你估啞謎，而且身強體壯，性能力正常，床上工夫更會着重前奏，令女伴欲仙欲死。
第三個特點，就係留意男友眼睛嘅大細，眼睛又黑又大，代表呢個人做事有膽識，最緊要仲係肯負責任，唔會o趙完鬆，丟低女友唔理。而且眼睛圓大，講嘢時正視前方，代表呢個人夠真誠，對女朋友會一心一意咁照顧。
最後要留意嘅係佢對手掌，如果肉厚而且紅潤，咁代表待人真誠，而且財運不錯，出手闊綽，經常都會買些小禮物送畀女朋友，等佢哋有意外驚喜。有以上特點嘅男仔，遇到就唔好放過呀！