當你見到一群外國男人，身穿女服，大玩易服癖嘅同時，仲喺大街上奔跑，一眾師奶村婦，一定會啋啋聲唔停。上個月喺成都，就有咁嘅事情發生，但當地嘅居民冇啋佢哋不特止，仲為佢哋拍掌打氣，究竟搞啲乜嘢呢？
撰文：小德
話說上個月成都天府廣場，突然出現幾十個紅鬚綠眼嘅外國人，本來都冇乜嘢奇怪，成都話晒都係大城市，有幾十個老外喺度集合，大家都見怪不怪，但最令人矚目嘅，就係佢哋全部着上紅色嘅女裝裙，唔通係班易服癖嘅發燒友喺度集合？市民大眾都畀如此奇怪嘅現象吸引住，有啲更第一時間通知記者到場，睇吓究竟發生啲乜嘢事？接報記者第一時間趕到現場，終於真相大白。
呢班外國人並唔係易服發燒友，原來係為咗幫助家境清貧嘅先天性心臟病病童，籌募做手術嘅費用，於是搞咗個跑步籌款活動，而佢哋要喺天府廣場集合，再跑去人民南路嘅一間酒吧作為終點，希望將籌得嘅款項，全數幫助中國有需要嘅病童。
外國人籌款都喜歡搞搞新意思，於是大會要求所有男參賽者都要着上紅色女裝衫裙嚟參與跑步，老外為咗做慈善，個個都樂於咁做。事件曝光後，成都市民全都收起奇異嘅目光，部分更為參賽者拍掌打氣，令當日舉辦活動圓滿成功。
事後有網友做咗個調查，話主辦單位係中國人組織，要外國參賽者扮女人嚟籌款，對方都欣然接受，但如果情況相反，外國組織要中國人着女裝嚟籌款，中國人又可唔可以照做呢？據調查所得，有四成人唔會參加，有三成人更話完全接受唔到，肯照咁做嘅兩成人都唔到，可以由此睇出兩地人嘅文化差異有幾嚴重，其實咁做都只係為咗籌款助人，又有乜所謂呢！