古人對每一個人嘅動作，都可以透過其姿勢不同，了解各人嘅性格同命運。而今日就同大家談談「臥相」，一般人瞓覺，唔係仰睡就係俯睡，再唔係就打側身睡，但喺臥相中仲有其他姿勢，試逐一介紹。
撰文：小德
最常見嘅就係擘開個口瞓覺，好多朋友喺熟睡嘅時候，都會擘大個口，而當佢哋打側身或者俯睡時，仲會流埋口水，當醒過嚟嘅時候，會發現自己一臉都係口水。呢種睡姿嘅朋友，喺相學中代表容易招惹疾病，自身免疫能力比較弱。性格方面，自制能力好差，只會隨欲念而行，喜歡食就會食到忘形，喜歡色就會縱慾狂歡，呢種人嘅身體想好都幾難，記緊要改變習慣，學習節制。
另一種最常見嘅臥相，就係瞓着覺時候咬牙，咬牙係指牙關咬得緊緊，睇到兩腮位置脹起，有呢種臥相嘅朋友，性格火爆衝動，往往會因小事而同人爭執，嚴重更會大打出手，惹官非上身或身體受傷，呢種朋友凡事都要忍。
發開口夢亦係最常見嘅臥相之一，喺醫學上認為呢種人日有所思，自然影響瞓覺時嘅質素，所以終日會精神委靡，精神無法集中。而喺相學上就指呢種人欠缺自信心，遇事膽怯懦弱，終日低聲下氣，只有喺夢中才能抒發己見，宣洩自己心中嘅壓力。
另一種最常見嘅臥相，就係熟睡時發生隆隆嘅鼻鼾聲，有呢種臥相嘅朋友，身體健康其實已經出現問題，所以一定要小心身體。性格方面，往往係一個粗心大意嘅人，經常都要為此付出沉重嘅代價，所以呢種人嘅運程，都係大起大落，仲有一個特點，就係每次性交後就會抱頭大睡，冷落另一半。