萬眾期待嘅上海世博，已經開咗幕成個星期，吸引嘅遊客每日數以十萬計，佢哋唔單止逼爆會場，仲逼爆埋地鐵、商場同埋食肆，據講仲連啲夜場都帶旺埋，但咪以為夜場爆晒棚就開心，原來背後有不為人知嘅一面，就同大家探討一下。
世博開幕至今，旅客數目屢創新高，市內經濟亦被帶動，好多行業生意都好咗好多。但夜場嘅負責人就大吐苦水，佢哋話每晚都有好多旅客到訪，但大部分都係低消費嘅客人，佢哋入嚟純粹見識一下，只係畀最低消費，然後就坐足一晚，有啲仲連囡囡都唔要，原本一晚可以有一百萬元營業額嘅大場，喺呢幾日雖然一樣爆滿，座無虛席，但竟係只做到六、七十萬元嘅生意額，令人感到意外。
據一位夜場經理志哥透露，原來旅客當中，好多都係嚟自唔同省巿嘅客人，佢哋一心嚟上海想見識吓，身邊唔缺錢，但就係唔捨得花費。佢哋喺老家玩一晚可以一千幾百已經好風光，但喺咁高消費嘅上海，咁嘅數目真係濕濕碎。
呢班內地旅客，千里迢迢嚟到上海，日頭觀光完之後，夜晚就想去上海嘅夜場見識吓，但只肯使心目中嘅預算，可能大約兩、三千蚊。喺上海夜場，兩三千蚊呢個數目，一個人嚟玩都唔止，佢哋一行幾人，只係霸住間房唱成晚，嚴重影響夜場嘅生意。
有人話可以唔畀佢哋入嚟？但據志哥講，佢哋都係打電話嚟訂房，有時真係好難分，佢哋嘅場有五十多間貴賓房，呢幾日佔咗六成都係外地嚟嘅低消費客，搞到生意額跌咗三成，最慘係冇房接待高消費嘅客人。囡囡亦大吐苦水，好多客人唔叫囡囡坐，一係就幾個男人搵一個，晚晚一個囡囡頂幾個客人，飲都飲到嘔，個個都詐型，搞到咁嘅場面，真係估都估佢唔到。
撰文：小德