內地嘅D吧（即酒吧加上Disco元素），客人以男性居多，所以好多店舖老闆都會向男顧客埋手，例如以靚女Dancer吸引佢哋幫襯。但問心講，所謂靚女Dancer我大軍就覺得好玩極有限，原因好簡單，佢哋淨係企喺台上面跳舞，甚至會走落嚟陪客人玩，睇得唔食得，試問邊有癮架？
早排大軍同一位內地D吧嘅老闆吹水，講到家吓Dancer嘅質素大不如前，佢都好有同感：「家吓啲o靚妹，莫講話飲酒，仲大多數都唔肯陪客人玩。」
既然乜都唔識，點解仲會請佢哋返嚟？呢位仁兄就話：「咪因為佢哋肯露肉囉！話你知，嚟得D吧玩嘅客人，好多只係為咗溝女，當佢哋睇見呢間場啲女咁索，又肯露肉，就算明知對方受溝嘅機會好微都好，仍然會博一博。」
聽見呢位D吧老闆咁講，真係唔知佢想賣酒定賣肉。不過講真句，如果唔係呢班囡囡願意行性感路線，肯犧牲色相，相信就唔會吸引咁多男人幫襯，何況生意唔好，間場自然執笠收場。
撰文：大軍