北上全面體:內地代孕成風 90後都嚟做代母

內地近年嘅代孕服務發展得十分蓬勃,唔知內情嘅人,仲以為係合法化經營。但據內地相關法規指出,代孕仍然係違法嘅行為,但點解近年又會大行其道呢?最近更有新聞話一啲90後嘅農村姑娘,亦準備投身做代母,究竟詳情係點?今日就同大家探討一下!

愈富愈不舉

喺內地上網打入「代孕」去搜尋,網頁自會打出不下數十個相關網站,每個網站都宣稱可以幫助生育出現問題嘅夫婦,解決代孕嘅問題,而收費由十多萬至數十萬元嘅都有,服務包括檢查身體、物色代母、試管手術、安頓代母、生產交收等。

而且仲有啲公司寫明話包搞掂,最近就有新聞爆出有人用55萬元包搞掂,代孕公司同一時間搵咗五個代母授精,最後生咗五個小朋友,事主當然唔要得咁多,於是受到社會譴責。家陣代孕服務竟半公開地經營,最主要嘅原因就係需求龐大、技術配合同埋供應充足。需求方面,可能人嘅身體真係變得差咗,特別係先富起嚟嘅一群,佢哋年輕時專心拚搏,弄壞身子,到想生育時就出現問題。

包食又包住

愈有錢嘅人就愈冇仔生,佢哋搵齊中西名醫都唔見起色,喺無辦法之下,退而求其次選擇代孕服務,以前試管代孕技術只得幾間大醫院擁有,做代母要同精子主人同室共枕,但現時技術普及,好多省巿嘅大醫院都可以做到,令代孕服務更為普及。

家陣做代母,唔使同男人上床,正如一啲代母講:「我們不賣尊嚴,只賣子宮。」於是吸引不少農村女性,爭住去城巿做代母,而做代母嘅價錢,由十萬至十五萬元不等,期間有食有住,就算授精失敗,亦有幾千蚊遣散費,如果成功做一次代母,可以掙到十年嘅收入,難怪連90後嘅姑娘,都話要嚟做代母啦!

撰文:小德