男士們如果性能力出現問題，好多時中醫師都診斷為腎虛，但原來腎虛並唔係男性獨有嘅病，女性腎虛嘅情況亦係十分普遍，而且腎虛對女性嘅損害，比起男性更為緊要，今日就同大家探討一下。
出現腎虛嘅正常年歲，應該係婦女更年期嘅時候，但現時生活壓力大，飲食習慣唔識控制，好多30歲以上嘅中年婦女，亦會有腎虛嘅情況出現，而最明顯嘅例子，同男性一樣，喺房事上最先會出現問題，三四十歲嘅婦女，理應最懂得享受性愛樂趣，但如果長時間出現性慾冷淡，就係腎虛嘅徵兆，如果不加理會，有可能提早出現更年期，踏入四十就會有停經嘅現象。
另外，身形同體重會出現變化，就係喺食量冇變嘅情況下，體重唔知點解會不斷上升，呢啲亦係腎虛嘅特徵。另外，眼同面都會出現浮腫，特別係早上起身嘅時候，情況會最為嚴重。
另外，最令女士憂心嘅，就係會大量脫髮，每日起身嘅時候，就會發現枕頭上面留有大量頭髮，之後每當梳洗嘅時候，都有大量頭髮脫落，呢個情況，亦係腎虛嘅迹象。
仲有就係身體會特別怕冷，人人都着短袖衫，但你就要着冷衫，但都會話凍，嘈住要熄冷氣，呢種情況又係腎虛嘅特徵。女士們出現以上情況，記緊及早搵醫生診治，多食啲滋陰補腎嘅食物，病情自會好轉。
撰文：小德