傳播細菌

內地嘅骨場多數以密封式設計，加上冷氣機、抽風機甚少清洗，空氣流通較差之餘，又容易潮濕，成為細菌繁殖最理想嘅地方。不過，最容易令人中招並唔係以上問題，而係場內提供畀客人使用嘅毛巾。

假如有性病患者用嚟抹過性器官，又或者身上有傷口嘅話，咁呢條毛巾就會藏有病毒及細菌，當其他人接觸過呢條「毒毛巾」之後，就有機會受到感染，就算你話只係用嚟包裹身體，但仍有機會中招，事關早有學者指出，性病呢味嘢可以透過接觸，以及非接觸嘅途徑而傳染。再舉個例，有人會用呢啲毛巾嚟抹乾對拖鞋，之後客人着上呢對拖鞋嘅話，就有機會感染到毛巾上面嘅病毒同細菌喇！

無法洗淨

或者大家會認為，呢啲毛巾都會拎去清洗過，應該唔會有問題，但事實未必如想像中咁美好。

據了解，部分骨場之內設有洗衣、乾衣機，但遇着有大量衣物要清洗嘅話，問題就會出現，事關將大堆毛巾放進洗衣機之後，中間位置嘅毛巾就有可能洗唔到，或者洗得唔夠乾淨。另一方面，就算可以確定百分百清洗過，之不過用嚟盛載毛巾嘅膠筒或膠籃，基本上十年都唔會清洗一次，有菌都唔出奇，將乾淨嘅毛巾放入去，又或者放置嘅地方唔乾淨，咪又係一樣有機會令人中招！

要避免受到感染，首先梗係唔好用呢啲毛巾嚟抹你嘅重要部位，盡量用紙巾或即棄濕毛巾代替，如身上有傷口更加要戒蒲。基本上睇見啲毛巾變黃、有破口、拎起手仲濕淋淋嘅話，就千祈唔好用喇！

撰文：娟娟