騎呢規條

據了解，呢間天體度假旅館名為「玫瑰園」，為德國首家裸體旅館，開設於旅遊區之一嘅黑森林（Schwarzwald），該處盡是樹林及廣闊草原，綠油油一片，景致迷人之極，最重要係遠離煩囂城市，喺呢個人煙稀少嘅地方，真係剝光豬都唔怕有人睇到。

旅館裏面設有三十多間客房，客人需要提早預訂房間方可入住。該旅館更定下一個有趣規條，就係但凡進入旅館範圍嘅人，都必須剝光衫褲，三點盡露，而且除咗性行為之外，基本上喺旅館內都可以赤裸裸去進行任何活動。

嚴禁性愛

呢個「玫瑰園」旅館嘅老闆叫弗雷德‧哈費爾科恩，出生於德國，佢係一個熱愛天體文化主義者，「裸齡」已經有二十五年。哈費爾科恩表示，只要住喺「玫瑰園」之內，就要一直裸體，而為咗保持旅館清潔衞生，所有旅客使用椅子時都要用毛巾或墊子。此外，最重要嘅一點係，為咗避免發生性騷擾等不愉快事件，喺旅館範圍內一律禁止性行為，如發現違反者，將會被即時驅逐離開。

哈費爾科恩又話，希望所有入住旅館嘅天體愛好者都可以暫時拋下情慾，透過運動、遊戲及交流中度過美好時光，無拘無束地玩樂一番。另一方面，旅館不但歡迎個人天體愛好者，更希望天體家庭都能嚟到呢度感受大自然嘅氣息，輕輕鬆鬆享受愉快嘅裸體假期。