理所當然

而夜場方面，亦只會揀啲樣貌娟好嘅年輕成員，一來能夠吸引觀眾視線，二來就可以培訓嚟做生力軍，而一啲已經廿幾歲嘅囡囡，雜技生涯就快完結，夜場嘅經理媽咪就會大力游說，而好多囡囡都會毅然答應，事關收入真係差別好大。呢啲表演雜技嘅囡囡，一個月人工只得一千蚊左右，平均計先至三十蚊一日，但做三陪，單係坐枱最少都二百蚊一晚，收入差別已經令佢哋無法抗拒。

另外，客人如果知道囡囡身懷絕技，大多數都會叫佢哋即場表演，做吓一字馬，拗吓腰，做完馬上可以賺到額外小費，如果肯去街，喺床上再表演一下絕技，客人嘅小費一定畀規定嘅多，收入豐厚關係，下海做三陪自然就成為呢班雜技囡囡嘅唯一出路。

欠缺觀眾

內地嘅雜技團，以省市為單位嘅團隊最有名氣，除咗可以定期演出外，部分仲可以得到政府補貼，所以隊員生計大多數冇問題，但亦有小部分係私人雜技團，以師徒制傳授技藝，並靠四出演出嚟維生，呢種生存方式維持咗百幾年，就算十年前開始城市化，呢啲小型雜技團仍可以喺農村搵到支持者。但當內地電視普及，電視台頻道多過巴士線嘅時候，雜技團便開始每況愈下。

由於連唯一嘅生計都冇埋，團員只有南下靠喺夜場演出嚟謀生，但就算係大型夜總會，每晚有演出，聘用嘅雜技人都只係少數，一個雜技團最少都幾十人，而夜場只得十個八個，惟有各散東西，就算團員落到班，生活依然係十分艱苦。

撰文：小德