花瓣太貴

據一位知情人士透露，桑拿場為咗威，證明自己嘅設施有幾巴閉，通常都會介紹客人浸浴，而最常見就係花瓣浴，由於浴缸太大，客人浸一次花瓣浴就要準備兩至三斤嘅花瓣，先至夠鋪滿整個浴缸，單係呢啲花瓣嘅錢，就需要三至四十蚊，有時仲唔止呢個數，有啲場為咗慳皮，將花瓣分量減一半，於是搞到大大個浴缸，水面上只浮着幾片花瓣，連一啲大場嘅特色都冇。

客人當然會投訴，於是有啲場改用其他浸浴用品，例如用泡泡浴、牛奶浴嚟代替，但要整滿一大缸水，無論泡泡劑定牛奶劑，都要成支以上，圍起條數嚟仲貴過花，依家至知當日嘅設計出咗問題，唔應該要咁大嘅浴缸，一般普通雙人浴缸就足夠啦。

循環再用

有啲場一於乜嘢都唔落，只提供齋浸，本來都好，但客人就唔會記得佢哋嘅浴缸有乜特色，於是有人諗縮數，一於照用花瓣浴，但啲花瓣就循環再用，客人用完，就派清潔工將花瓣撈起，放喺太陽下曬吓佢，當花瓣乾身後又再用。

呢條橋確實唔錯，事關啲花可以循環咁用幾次，慳番唔少錢，至於香味，原來佢哋會再落花香味嘅香薰，令池水變香，所以啲乾花冇香味都唔緊要，但最擔心一樣嘢，就係會唔會將客人嘅皮膚病，傳染畀其他人呢？有皮膚科醫生話，花瓣放喺陽光下曬，如果花芯未曬乾，再放入池水裏面，病毒就有機會從中釋出，令下一手染病，大家北上浸花瓣浴，真係要小心啲呀！

撰文：小德