少女的回憶

呢個派對09年中推出，反應十分之好，之後每次搞都爆滿，我哋搵嚟負責人凱緹小姐，問佢呢個派對點解會咁受歡迎，佢話：「其實自金融風暴後，好多企業嘅高中層，都由女性掌控，佢哋成為最大嘅消費群，所以我哋搞娛樂嘅，就要針對佢哋嘅巿場，而日理萬機嘅事業女性，工作之後最想就係有一啲可以畀佢減壓嘅活動玩吓，於是就諗到呢條橋。」

凱緹條橋就係要所有來賓，都要扮番十五六歲，天真無邪咁樣參加舞會，凱緹話：「起初都擔心佢哋唔會接受，但現場全部播番以前啲流行歌，提供懷舊小食，連啤酒都換番支裝，等佢哋一入會場，就回憶起少女時代去派對嘅種種情景。」

舞男最辛苦

由於氣氛一流，所以女士們好易受到感染，原本唔想扮少女嘅，都馬上入化妝間大變身，真係阿Sam首歌咁樣，個個「三張幾嘢，紮起辮仔，青春美麗，就冇失禮」，派對除咗可以令女士們懷舊一番之外，仲可以讓佢哋反叛一吓，例如有啲掟嘢嘅遊戲，等佢哋可以宣洩一吓工作壓力，另外仲可以玩吓鋼管舞，做啲平時唔敢做嘅事情，當然戲肉就係一早安排好晒啲靚仔舞男。」

凱緹話：「我哋每場有兩百人參加，但只係搵到六十個舞男，供不應求，可想而知呢班囡囡有幾咁飢餓。」原來好多囡囡嘅第一次失身都同派對有關，所以她們想尋回失身嘅回憶，舞男就算再多，都應接不暇。

撰文：賢