最近身痕走去長安睇吓乜嘢環境，由於有朋友揸私家車去，所以一車車咗去間相熟嘅桑拿場，一去到門口，發現重門深鎖，睇吓隻錶，見係下午三點幾，起初仲以為未開門或者熄燈營業，但成幢大廈人影都冇個，睇嚟真係停咗業咁樣。
就喺門口裝裝吓嘅時候，突然有個保安走過嚟，問我哋嚟做乜？我哋咪話想嚟幫襯囉！個保安再問一次我哋係乜嘢人？我於是話係香港嚟嘅，想幫襯揼骨啫！再問佢係咪執咗？今次保安肯回答啦：「冇得揼骨啦！掃黃間場停咗成個月啦！」
當我哋請個保安食煙仔之後，佢嘅態度立即唔同晒，仲靜雞雞話畀我哋知，點解再三問我哋係邊個？原來呢度周不時都有便衣嚟問長問短，我問佢啲便衣嚟問乜嘢？佢話咪係嚟問間場係咪停業囉！如果只係熄燈繼續營業嘅，佢哋就會安排突擊檢查。
見個保安咁肯爆料，再問個保安，前排大掃黃究竟拉咗幾多人？佢話其他場就唔知，但呢個場就冇畀人拉，只係因為牌照唔夠，所以老闆喺行動前一日，決定自動停業，落閘熄燈，叫啲伙記等風聲冇咁緊至再開工，呢個老闆咁合作，認真識做。
撰文：大軍