極速相睇

日本溝唔到女嘅男仔就畀人叫做電車男電車女，而內地嘅單身一族，近年亦都有新稱呼，就係剩男同剩女喇！唔知係咪因為內地男女嘅要求日漸提高嘅關係，所以好多男女揀完又揀都未搵到心中所愛，因而令剩男剩女愈來愈多，甚至被人認為係一個社會問題。

較早前，民間為咗令一眾剩男剩女搵到好歸宿，所以特別將11月11日定為光棍節，藉此鼓勵佢哋主動出招！另外，近期深圳一帶亦興起好多聯誼活動，令單身人士有更多機會結識異性，而八分鐘交友會就係最潮嘅一種！八分鐘交友會嘅意念係源自美國人氣劇集《色慾都市》，主要係安排八至三十對男女到酒吧等娛樂場所見面，不過一男一女交談嘅時間限定為八分鐘，之後就要起身換對象，希望每個人都可以用短時間結識大量異性。

龍蛇混雜

由於參加八分鐘交友活動嘅男士內心都相當寂寞，所以佢哋漸漸成為唔少援交女嘅目標！有消息指出，八分鐘交友活動當中，有為數不少嘅援交女參加，同時亦有酒吧拳手。酒吧女拳手嘅出現，主要係方便湊夠人數，同時亦會不斷引誘其他人飲酒，以達到幫助酒吧促銷嘅目的。至於援交女，短短八分鐘嘅交談過程當中，佢哋睇準目標，然後向對方大肆拋眉弄眼，同時亦會細細聲勾搭對方，例如問「你今晚有冇人陪呀？」又或者「想唔想試吓做大人嘅滋味呀？」之類嘅挑逗性說話，意圖撩起對方嘅慾火。然而，八分鐘交友會一般都唔會容許男女雙方即場交換電話等資料，所以援交女會靜靜地將一早寫低電話嘅字條塞到對方手中，方便會面之後聯絡。

撰文：賢