香港人用手機上網嘅情況都幾普遍，但用手機嚟睇色情資訊，就唔係咁多人用。內地就好唔同，佢哋大量下載色情訊息，資料顯示，舊年涉及嘅金額，就已經高達數千萬元。為免色情資訊氾濫，最近內地舉行全國性嘅手機「掃黃打擊」行動，主要針對手機網站發放色情訊息。
空殼公司
大家都知道電腦上網同手機上網，供應商可能一樣，但其實係兩樣嘢嚟，特別係手機網絡，啱啱出咗冇耐，使用人數已不斷上升，於是供應商需要大量手機網站，提供各類資訊，於是不法分子就看準機會，以掛羊頭賣狗肉形式傾銷色情資訊。
供應商見佢哋有登記有註冊，以為冇問題，於是批準佢哋喺手機網絡平台發放訊息，點知好多都係空殼公司，佢哋胡亂發放色情短訊，吸引用家連結或者下載佢哋嘅資訊，起初可能係免費，但之後就逐樣收錢，一段十零分鐘短片就要收十蚊八蚊。
收藏有罪
咪睇小呢十蚊八蚊，由於每日嘅下載人數實在太多，所以佢哋豬籠入水，於是變本加厲，令色情風氣喺手機網絡上急速蔓延開去，由於學生同小朋友都可以上網下載，所以有關方面決定全面整頓，但咪以為我哋冇上內地嘅手機網，就唔關你事呀！
原來佢哋所謂嘅發放手機色情訊息，除咗透過網絡之外，朋友間互相send色情資訊，都屬違法，所以大家千萬要小心，此外，手機內藏有色情相片或短片，也可能觸犯藏有及保管色情訊息罪，所以手機裏面有啲乜嘢鹹濕嘢，好快啲刪除晒佢呀！
撰文：小德