雖然近日天氣回暖，但其實天氣轉變已經告訴大家「冬天」嚟啦！所以一定要保重身體，特別係老人家，更加要多着衣服小心着涼，而有前列腺疾病嘅患者，更要保重，因為冬天係前列腺病嘅高發季節，今日就教大家四招傍身，預防病發。
保持體溫
首先要保持身體溫暖，多着衣服，另外如果天氣太冷，記得要戴帽、戴手套同埋圍頸巾，因為寒冷會使交感神經異常興奮，前列腺腺體會因此收縮，腺管同埋血管受壓，就會引起充血，痛楚感覺會再度出現，所以天氣一凍就要多着衣服全身保暖，咪以為只多着幾條褲就會冇事。
其次就係唔好長時間坐喺度唔郁，一到冷天，特別係長者嘅最佳娛樂，一定係搵埋三五知己，圍埋喺屋企打麻雀，原來長期坐喺度，下陰部分就會過度受壓，導致前列腺充血，因而引起病情反覆，所以患者千祈咪長時間坐喺度，無論打麻雀定做嘢都唔好，另外搭長途車時更要小心。
唔好忍尿
第三就係要飲多啲水，天氣轉冷好多人都會怕去廁所，所以飲少啲水，但原來咁做可能會令尿液濃縮，其實對腎臟和膀胱都唔好，特別係前列腺患者，更應該喺冬天保持每日二千毫升水分嘅攝取量，令小便濃度保持正常，而且仲可以以尿液沖洗尿道，促進前列腺分泌物嘅排出。
最後就千祈咪忍尿，天氣轉涼，特別喺夜晚，好多患者尿急都唔會起身去屙，以為忍得住，但原來尿液會令膀胱過度膨脹，因而令前列腺受壓，引起痛楚，而且可能導致排尿困難嘅出現，此外，煙、酒、咖啡同埋太過辛辣嘅嘢都少啲食，咁樣喺冬天，就唔使怕前列腺病會復發啦！
撰文：阿豪