迎香壯肺功能

其實鼻敏感同個人嘅體質有關，只要注意飲食，作息定時，保持心境平和，加上每日做適當嘅運動，體質自然會有改善，鼻敏感嘅情況就會消失，另外，不要相信藥物可以根治鼻敏感，因為坊間多數鼻敏感藥，都只係治標，唔能夠治本。

除咗做運動之外，今日就教三個穴位等大家一有時間就按摩吓，可以紓緩鼻敏感嘅徵狀，呢三個穴位分別係迎香、合谷同埋足三里，首先介紹迎香穴，佢嘅位置位於兩邊鼻翼邊邊，左右都有，按壓時用兩隻食指，呈八字咁向內施壓，會有麻痛感。

迎香係屬於手陽明大腸經，與肺互為表裏，所以按壓會強壯肺部，紓緩鼻敏感嘅功效，按壓時間方面，以食指用少少力往內按壓住穴位，然後默數三十六聲，夠數後放開就可以，最好早中晚各做一至三次，咁樣鼻塞流鼻水嘅情況，就可以得到改善。

足三里固脾胃

此外就係合谷穴，位置就在食指與拇指之間，對入一指骨之內，同屬手陽明大腸經，功效除咗強健肺部外，呢個穴仲可以紓緩好多痛症，時間方面，建議用拇指度位，一指骨位置後用指尖向穴位輕揉，有少少痠痛感就正確，左右手各揉三分鐘。

最後就係足三里，顧名思義呢個穴位就係腳上面，尋穴先要坐好，膝蓋彎起，用三隻手指平放喺膝蓋外側，三指之下脛骨旁有一個凹位，就係穴位所在，屬足陽明胃經，功能可以強化臟腑，時間方面用拇指頭用力揉三分鐘，左右各一至三次就可以。

學識呢幾招，大家可以試試自行按摩，喺做愛時同啲鼻水講拜拜！當然啦，問題仲未能夠解決的話，就一定要去睇醫生呀！

撰文：賢