蛇仔引路

據一啲受害者透露，啲騙徒會喺大型巿場嘅靠邊位置擺檔，大字聲明正牌香水特價酬賓，以河南嘅案件為例，騙徒以名牌法國香水特價三十蚊一支嚟吸引女士，由於小攤喺隱蔽位置，所以佢哋一般會有幾個蛇仔喺大街負責拉客。

呢啲蛇仔大多數喺中年婦女，方便向年輕女性埋手，當見到獵物出現，蛇仔就上前攔着佢哋話有名牌香水特賣，當客人稍停步時，就會攞啲試味紙或者舉起噴有香水嘅衣袖畀客人聞聞，佢哋做示範嘅當然係正貨，於是客人輕易上當。當客人跟着蛇仔走到偏僻處時，好多都會問點解去啲咁靜嘅地方？蛇仔自然會話因為全是逃稅商品，所以唔可以畀人知道，當去到現場，一般有個小攤亂七八糟咁擺滿多款名牌香水，店員就會叫你嚟試吓味道，而且再三聲明全部幾十蚊有交易。

失金失身

女士們見到喺百貨公司賣幾百蚊嘅香水，家陣只賣幾十，自然湧埋去試，起初會揀自己嘅心水，但冇幾耐，店員就會介紹一啲新款嘅畀佢哋試吓，當一聞之後，就會天旋地轉，最後更會失去知覺，最後當客人醒番嘅時候，所有現金同貴重物品都會冇晒。事後個小攤自然人去樓空啦，有啲個案嘅女事主仲畀人帶咗去開房，搞到失金又失身。

所以都係嗰句，北上遊消費，認真便宜莫貪，唔聽勸告破財都係事小，為買支香水搞到貞操不保，你話幾咁唔值得呢？男士咪笑呀！記住教女友小心呀！

撰文：小德