酒吧拳手向來畀人感覺爛玩爛飲，但今時唔同往日，家陣做拳手最重要係有禮貌，仲要識得利用唔同方法去冧客，好似呢次訪問嘅美少女Bobo咁，絕對係酒吧入面嘅禮貌之星，不但氹得客人鬼咁開心，就連其他同事都話錫晒佢添！
以禮待人
據了解，Bobo只係喺尖沙嘴「鳳凰吧」工作咗兩個月左右，但已經認識咗唔少熟客朋友，而且與其他同事相處融洽，老闆更對佢嘅工作表現讚不絕口，到底佢有乜嘢魅力，可以令到大家都咁Like佢呢？Bobo就話：「其實我從來都冇刻意去討好其他人，只係覺得待人接物要八面玲瓏，同時最緊要有禮貌同笑容好，咁人哋對你嘅印象分都會高啲，感覺更親切。」老實講，好似Bobo呢亭咁識做嘅酒吧拳手，家陣真係唔多。
唔怕蝕底
除此之外，Bobo更係一個非常勤力嘅女仔，除咗同大家猜兩板、飲番杯，仲會主動協助其他同事，好似幫手執枱、拎啤酒、落Order等，或者大家會覺得呢啲都係雞毛蒜皮嘅工作，但對於經常做到唔停手嘅侍應嚟講，Bobo確實為佢哋減輕唔少工作負擔。
雖然大家都對Bobo評價甚高，但佢仍謙虛咁話：「其實呢啲都係舉手之勞嚟！何況大家有緣喺同一間酒吧工作，唔應該斤斤計較，相反要互相幫忙，咁大家自然做得更開心啦！」呢位美少女果然醒目，難怪咁多人鍾意佢喇！
撰文、攝影：娟娟