話說上星期有間酒店嘅足浴，因為冇晒足浴房，經理就介紹客人玩按摩，點知客人發爛渣，於是先而口角繼而動武。由於客人有三個，個個孔武有力，同事見經理畀人推撞，即時走出六個人嚟同客人拳來腳往，最後客人當然頭破血流。

換轉係港人客，一定會先走人，之後就報警求助，搵警察處理，但由於客人係當地人，佢哋冇走到反而即時吹雞，大批親友聞風趕至。最後係足浴中心報警，搵警察嚟維持秩序，防止啲本地人嚟搞事，由於客人個個傷晒，休閒中心確實理虧，於是賠咗兩萬三蚊醫藥費，仲要老總出面道歉，咁至冇事，認真損失慘重。

事後有其他休閒中心老闆得知，就話近年多咗好多同類事件。客人借故引員工動手，之後客人受傷，就叫人嚟包圍中心，由於私人毆打，不屬刑事，只要私下處理，警方亦唔會插手，於是往往都係賠錢了事，老闆們擔心此風一長人人嚟搞事，乘機屈錢，咁就麻煩，所以話地頭蟲真係唔可以得罪架！

撰文：大軍