撰文：小德

未盡全力

單係東莞南城警區就出動365名警員，兵分五路巡查全鎮多處黑點，包括85間旅館、16間桑拿、13間KTV、23間足浴、131間商舖、50間髮廊同埋358間出租屋，呢啲資料全都都係南城警區發言人向記者發放嘅資料，短短24小時做咁多嘢，真係冇得頂。

當然有口痕友懷疑，短短24小時內點做咁多嘢？會唔會有人報大數，呢層真係無法證明，但係可以從另一個數字睇到小小玄機，就係整個行動，一共拉咗31個人，當中14人涉賭博犯罪，餘下17人就係觸犯賣淫嫖娼，數字係咪好可疑呢？

有網友就話隨便去一間桑拿，拉嘅小姐都唔止呢個數啦，點解佢哋搞咗成晚，去巡查咗咁多地方，最後只拉到小貓三兩隻呢？會唔會有人未盡全力呀？呢層真係唔知，之後喺常平亦都掃咗次，涉嫌嫖妓同企街嘅就拉咗41人。

跨區互踢

常平都只係拉到41人？而麻涌拉咗16人，但就冇涉及色情犯罪嘅，而寮步就抓獲26宗涉黃案，但拉到幾多人就冇講，而長安號稱「人肉巿場」嘅上沙第四工業區，更一個人都冇拉，只係話已經布下天羅地網，只要一有人犯案，就會將佢繩之於法。

睇嚟今次東莞掃黃都係求其交貨，唔似當日深圳掃黃咁有魄力。單係自己警區負責番自己嗰區，就好難做得出好成績，因為關係千絲萬縷，應該學似深圳咁跨區互踢，你掃我嘅場，我冚你嘅店，咁至有用㗎嘛！不過咁都好，大家都會安全啲。