即時報名

呢間位於展館五樓嘅參展商，見人人都喺樓下參觀，但就冇乜人上五樓，於是決定要諗啲計仔，原本佢哋早就用四千蚊嘅日薪，請咗一個車模嚟演出，但唔知係咪有人出更高價，個車模竟然放飛機，搞到人又冇、女又冇，於是老闆決定把心一橫，攞疊人仔出嚟，再喺咪高峰入面大叫：「所有現場嘅觀眾特別係年輕男女，如果邊個敢着泳衣上台走騷三分鐘，即刻畀五百蚊作為酬金。」

咪以為會有好大反應，在場嘅觀眾全部都半信半疑，就算老闆發晒毒誓話唔係整蠱，但都冇人肯上台走騷。到咗十一時左右，有對男女出現，見走上台三分鐘騷就有五百，於是膽粗粗報名，一時吸引咗近百人圍觀，但由於老闆冇安排男性泳衣，只可以着女裝泳衣出現，所以當年輕人一出場，就引嚟滿堂大笑，但當佢真係走完三分鐘後，老闆即時畀錢。

為錢一脫

在場觀眾即時起哄，證明老闆所講貨真價實，童叟無欺，之後少女亦換好泳裝出場，即時尖叫聲響徹會場，好多樓下嘅來賓都走上五樓睇吓，一時五樓全部都逼滿人，當三分鐘過後老闆亦照畀五百元酬金，在場所有人都十分驚訝，一時傳為佳話。

後來有關方面出面勸喻老闆，老闆惟有取消演出，但知道泳衣騷嘅魔力，老闆翌日出重金，請咗幾個囡囡嚟着三點式演出，但反應一般，點都冇即場叫人上台走騷咁震撼，今次老闆嘅噱頭夠晒出位，但幫佢賣到幾多部車就唔知道，祝佢好運啦！

撰文：賢