香港城中有好多名媛，原來喺美國亦一樣，佢哋經常出席大小宣傳活動，有時見報仲多過啲明星，有派對搞手睇準呢個巿場，特別搞一啲專為名媛而設嘅派對，等佢哋可以瘋狂咁玩一晚，據講每位收費要成千蚊美金，都咪話唔富貴。
大量靚仔舞男
負責搞呢個名媛派對嘅搞手當奴，係當地最有名嘅派對搞手，佢話呢個巿場絕對值得開拓，因為：「咪睇佢哋一身名牌，成日夜蒲，以為佢哋過得好好，好多時佢哋都會好寂寞同埋好壓抑自己，就算去玩，都成日怕畀狗仔隊見到，因而勒住勒住。」
當奴繼續：「所以我特別為佢哋搞一個派對，謝絕所有狗仔隊，令佢哋玩得更加放心，難得冇人騷擾，內容方面就可以玩得更放更徹底。」於是當奴安排大量靚仔舞男出現，但要令淑女變得瘋狂，仲要有多樣嘢。
當奴話：「冇錯！就係酒，一個派對要搞得成功，音樂同酒都唔可以分開，音樂方面我有多支成名樂隊喺手，絕對唔係問題，反而酒係一個難題，因為好多囡囡，都唔會飲威士忌、伏特加、拔蘭地等烈酒。」
靠名媛搵贊助
而低酒精成分嘅啤酒，又顯唔出名媛嘅身份，至於紅酒，喺派對比較少用，最後諗嚟諗去，當奴決定用香檳酒，於是佢就向酒廠搵贊助。原本一般派對搵酒商贊助，難有回音，但城中名媛出席嘅瘋狂派對，咁又唔同，酒商即時答應。
當奴有見及此，知道名媛效應有用，於是四出搵贊助，美食商更送出鵝肝、魚子醬同魚生等作為派對食物，加上全場香檳任飲，賓客畀一千蚊美金都會覺得值回票值，當奴今勻賺到笑。
派對當晚有過千城中名媛出席，喺美酒美食嘅影響下，一到舞男出場，所有名媛都不顧身份，忘情咁瘋狂一番，人剝佢又剝，場面即時失控，盡興完畢後，幸好名媛有司機接送，唔係一街醉娃都幾失禮人，整個名媛派對最後更圓滿結束。
撰文：小德