臥底神探建功

話說鄭州巿喺上個月，派出三百名警員，巡查全巿黃賭毒場所，希望做啲成績，而當地傳媒亦隨隊出發，希望拍到第一手照片，可惜當地「環境」實在太乾淨，竟然無功而回，最後大隊安排傳媒前往一間休閒中心，而接待大隊嘅唔係老總，而係個光頭顧客。

傳媒起初都有啲奇怪，光頭顧客帶領記者直闖中心之內，然後叫負責人攞鎖匙，負責嘅女經理當然冇理佢，點知光頭顧客隨即着住拖鞋踢門，呢個時候大家都意味到呢個光頭顧客，就係警方派駐嘅臥底。當大門被光頭顧客踢開之後，一眾記者同警察衝入，但最搶眼嘅都仲係光頭臥底，一手拉咗床上兩條肉蟲落地，仲將全裸嘅囡囡個頭拉高畀記者影個夠。事後呢段片同埋照片，自然成為各大媒體嘅第一手資料，亦引起掃黃時警方有冇權將小姐裸照公開嘅爭論。

一日做足26次

而新聞片仲有下文，就係喺其他房間拉到另一個囡囡，喺佢嘅手袋裏面搵到本記事冊，警方問佢裏面寫乜？佢當然唔肯講，於是警方就向記者解畫，話記事冊內記錄咗囡囡喺今日之內進行咗26次賣淫勾當嘅記錄，記者如實報道，話情況嚴重。

但網友隨即炮轟，一日點做26次，由於被掃嘅係休閒中心，以按摩足浴做包裝，就算掛羊頭賣狗肉，服務都係以鐘計，就算每鐘9個字，而拘捕時間係晚上11點，如果要做26次，咁即係囡囡由前晚十二點開始一直冇食冇瞓，直至做到被捕嗰刻為止。網友一致認為冇乜可能，就算自己地方嘅鳳姐，都未必做得到，所以懷疑有虛報嘅成分，本來掃黃維持治安，係無可厚非嘅事，但搞到咁多問題，有網友話係咪好大喜功，想喺傳媒面前做場騷呢？咁真係唔知道，希望有關方面咪再咁蝦碌啦！

撰文：小德