先畀按金

夜場要好好管教囡囡一啲都唔容易，尤其內地夜場，由於樹大有枯枝，一個傳一個，結果囡囡之間變得好食懶做，無晒規律。

但對住呢班夜場女，大吵大鬧同苦口婆心可以話行唔通，事關呢一行嘅流動性實在太高，需求又大，衰啲講囡囡完全「唔憂做」，所以一般定額罰款根本冇人理，再寸啲甚至劈炮唔撈都不足為奇！而多年嚟，夜場每次請囡囡時，就會先講罰款制度，依家仲離譜，大場會要求囡囡先畀一筆按金，呢筆錢係用嚟避免囡囡做做吓走人，雖然每間場嘅罰則唔一樣，但基本上大同小異。

互相告發

以夜總會為例，囡囡遲返工要扣錢，早走要扣錢，陪客中擅自離房十五分鐘以上，又要扣錢，旺日請假，例如周末周日及公眾假期前夕，統統要扣錢，不過最嚴重係放客人飛機，或者收咗錢冇交足貨，呢類情況一遇到人客投訴，更要即時重罰！假如囡囡當中衰多過兩樣嘢，例如遲到兼離枱，該月按金即時歸零！據講最少都成八百元人仔o架！想攞番並非無可能，要連續一個月無犯任何過失，但對囡囡嚟講機會近乎零！

桑拿都唔見得好，囡囡入職一個月後要為公司拉熟客捧場，若然月結唔夠數，囡囡要被扣錢，但最陰毒係，有啲場樂於鼓勵囡囡間互相告發，如屬實，罰金就歸告發者所有，喺呢種制度下，確實令唔少囡囡唔敢亂嚟。之不過凡事總有應對方法，好似大多數夜場都容許囡囡喺生理唔方便日請假，不過就要囡囡證明確實係唔方便，所以唔少囡囡都會搵好姊妹幫手，借用對方用過嘅衞生巾呃公司，真係你有張良計，我有過牆梯！

撰文：祖