內地近年最出名搞「山寨貨」，意思就係人哋有乜嘢，佢哋又搞一個近似嘅出嚟，例如台灣有周杰倫，內地又會搵一個山寨周杰倫出嚟；人哋有漢堡包連鎖店，佢哋一樣可以搞個山寨漢堡包連鎖店。最近仲大膽到連日本嘅國粹AV片都敢染指，後更因為拍片時呻吟聲過大而被人識破，結果梗係拉人兼封艇啦！
搵唔到母帶
內地喺十月尾有則網上新聞報道，有製作公司竟然喺湖北武漢嘅豪宅別墅區，租咗一幢四層高嘅獨立別墅嚟做AV片場，由於守衞森嚴，加上豪宅平日門窗緊閉，諗住神不知鬼不覺，但由於經常傳出女性嘅淫聲浪語，於是畀啲街坊舉報，將事件揭發。
呢間山寨片場，有齊拍攝廠房、化妝間、休息室等設施，每日都有六七人出入，咪以為係無牌工場，原來有齊工商營業執照，對外報稱係間婚紗攝影公司，但當有關人員搜查時，一件婚紗都搵唔到，只搵出大量制服，同埋性道具、SM用品等，應有盡有。
今次行動撞啱佢哋收晒工，現場只捉到幾個男女，全部報稱係公司職員，而且喺現場有關拍AV片嘅嘢一啲都搵唔到，只喺電腦搵到工作人員嘅名單，同埋大量囡囡嘅泳衣照，事後問過屋苑保安，原來佢哋每日都會叫速遞公司嚟攞文件送離現場。
經常換主角
從各方面嘅資料顯示，有理由懷疑佢哋每日將拍攝好嘅四仔，透過速遞公司送走，甚至運出海外，有關方面正從呢條線索展開調查，當地記者問過現場保安，原來呢間公司開業一年多，期間不停有好多樣貌娟好嘅女性出入，但由於出入都很低調，所以冇起過疑心。
而呢啲女仔，一般逗留三至十日，之後又會換另一批人，至於男職員都係嗰幾個，最後問佢豪宅啲呻吟聲係咪特別大，保安話間間屋都差唔多啫！睇嚟呢單嘢唔係鄰居睇唔過眼啲呻吟聲，都唔會踢爆。所以話做乜嘢都好，記住搞好啲睦鄰關係呀！
撰文：小德