基仔話：「近期內地嚴打嘅風頭過去，所以好多夜場都陸續重新營業，作為熱愛夜蒲人士嘅我當然開心到不得了啦！以我嘅經驗，嚴打之後，夜生活雖然昌盛，但係活躍嘅唔單止係蒲友同街女，仲有好多不法分子。同一時間，消息話，由於有新鐵路即將興建，令深圳一帶樓價會上升，所以吸引不少有米港人上去睇樓，視佢哋為肥羊嘅不法分子梗係唔會放過呢個搵錢嘅好機會啦！」

基仔繼續道：「我其中一位朋友話近期喺深圳搭車都明顯見到好多蛇頭鼠眼嘅人，有一次仲差少少中招。佢話當日搭大巴去水圍，當時有兩個外省人同佢一齊上車，一個就坐佢旁邊，另一個則企於附近，呈L形咁夾住佢。好彩呢個朋友都醒目，知道自己成為目標，於是就扮好心，讓座畀其他人，如果唔係一定畀佢哋夾住嚟搶。另外，有一次我嘅經歷都幾得人驚。嗰日，我同女友去到東門行街，突然間我覺得有人用硬物篤我屁股。當我轉身一望，就見到有人手執一支螺絲批，唔使問都知佢想用個螺絲批篤我後面嘅褲袋，等我個銀包跌出嚟啦！而事敗之後，佢就即刻走人。不過，諗落都幾危險，如果佢眼界差啲，一支咁尖嘅螺絲批插埋嚟我就真係傷得重喇！」

賢