難以兼顧

呢兩位靚女分別係今年24歲嘅森下悠里同埋25歲嘅香里奈，佢哋兩位都係當時得令嘅性感女星，前者喺雜誌界無人不識，後者更走到幕前，喺電視劇擔任女主角，睇嚟兩位靚女人氣咁旺，都仲有排紅。

人紅自然多追求者，啲狂蜂浪蝶，真係用殺蟲水都殺唔晒，而兩個囡囡亦都好明白一個道理，就係只要一拍拖，就等於放棄一切，於是堅決喺拚搏期間，唔談戀愛，點解會下咁大嘅決心呢？我哋先問一問森下。

森下話：「世事有好多嘢係好難兼顧嘅，愛情同事業就係其中之一，你要有愛情，就好難兼顧事業，當然你可以好自私咁，要個男仔默默地等待你，但我覺得咁樣對佢哋好唔公平囉，所以我一定唔會咁做。」

粉絲支持

森下仲話：「而且喺拚搏期間，時間表根本就排到密一密，你想有休息嘅時間都好難，仲邊有時間拍拖呀！如果要個男仔只係夜晚陪你，咁即係當男友係男妓，我就唔會咁做，所以不如專心做好工作好過。」

人生冇啲愛情滋潤，唔會覺得好沉悶咩？森下話：「除咗另一半，身邊仲有好多人可以支持你同關心你嘅，例如家人、朋友、而身為女優，仲有好多粉絲都會支持自己，所以我要為佢哋努力，絕對不能放棄。」

至於另一位靚女香里奈又點睇呢？香里奈話：「如果我未紅之前，就已經有一個好好嘅男朋友，咁我覺得兩個人嘅關係就要好好保持落去，但當紅咗之後，再搵段愛情嚟令自己更加忙，我覺得唔應該咁做囉。」

自行解決

香里奈再補充：「而且傳媒啲狗仔隊，根本就(目及)到實，你同異性朋友食餐飯，就已經畀佢哋傳為緋聞，想好好談戀愛，認真有難度囉，要花咁多心機落去發展地下情，不如用心喺事業上拚搏幾年咪仲好。」

香里奈講得又幾有道理，但一個人生活唔悶咩？香里奈話：「一個人生活反而自由自在，相反有個男人喺屋企，你仲唔自在，間屋唔執又唔係，唔煮飯畀佢食又會囉囉攣，所以都係感情免問，少啲煩惱。」

萬一有性需要又點解決呢？香里奈話：「咁咪到時至算囉！都咁大個人，唔通唔識得解決咩？」睇嚟佢真係有方法解決喎，點都好，既然一心工作，唔講兒女私情，就祝願佢哋前程似錦，心想事成啦。

香里奈小檔

出生日期：1984年2月21日

身高：164cm

三圍：34-22-35

血型：A

森下悠里小檔

出生日期：1985年1月30日

身高：160cm

三圍：35G-22-35

血型：A

撰文：小德