好難買胸圍

若你以為兩個都係年輕水着妹，咁就大錯特錯，當中櫻井美春今年已經42歲，但睇樣同身材真係畀佢呃晒，而堀井美月就後生得多，今年只係23歲，兩代巨乳大美人，一於問吓佢哋胸前咁偉大，究竟係好定唔好？

櫻井話：「我個年代因為着衫比較密實，所以就算擁有驕人身材，除咗男朋友之外，根本就冇乜人知道，所以對我嚟講，胸前偉大係好處定係壞處，我真係唔係咁知道，唯獨有一樣嘢，令我十分煩惱。」

原來就係買胸圍，櫻井話：「而家巨乳嘅囡囡比較多，所以胸圍嘅呎吋同級數都會出到好大，但當年大胸嘅女仔就比較少，我嘅尺碼根本就買唔到適合嘅胸圍，要買外國人尺碼嘅胸圍嚟用，認真麻煩。」

性格好樂觀

胸大一啲着數都冇？櫻井話：「我哋當年着得好密實，人哋都唔知你個胸有幾大，所以攞唔到任何好處，但自我出道之後，經常低胸或者緊身衫示人，啲男人真係對我客氣咗好多，經常蓮子蓉咁對住我。」

有得畀我望住櫻井個胸，我都笑出嚟啦，我哋轉問年輕一代嘅堀井美月，胸前咁偉大，有乜嘢好處？有乜嘢唔好？堀井話：「好處就係好多人留意你，就算着好普通嘅衫，甚至唔化妝都大把人望實你。」

堀井繼續說：「而且我覺得大胸嘅女仔特別樂觀，經常笑到好大聲，所以特別容易識到新朋友，我身邊就有好多朋友。」九成係男仔啦？堀井一笑：「你點知架？」邊個男人唔想做你朋友吖！

游水離晒罩

堀井話自己成日都咁開心，所以心情特別好，人都冇咁易老，講咗咁多好處，咁有冇一啲唔好嘅嘢呢？堀井話：「細個時買胸圍都有啲麻煩，後嚟選擇多咗，先至冇咁煩惱，另外，游水時着三點式都幾麻煩。」

原來堀井個胸實在太大，三點式嘅罩，根本唔可以包得晒，平時唔郁都冇問題，但係一游水就會移位走晒出嚟，喺海灘游水都好啲，喺泳池啲水咁清，一定會畀人睇到晒，早知約佢去泳池做訪問啦。

最後堀井話：「胸部太大，好容易吸引異性追求，試過一日有四個男仔向我表白，真係煩都煩死。」有一啲女性，分分鐘成世都唔會有人追，多人追講風涼說話啦，小心冇人追嘅時候後悔呀！

櫻井美春小檔

出生日期：1967年1月2日

身高：157cm

三圍：36、25、35

血型：O

興趣：聽歌

堀井美月小檔

出生日期：1986年4月21日

身高：148cm

三圍：36、25、34

血型：A

興趣：唱歌

撰文：小德