無論男人或女人，總會有性需要嘅時候，之不過講到終身伴侶，始終係用愛情去衡量，而唔應該只係用性嚟做出發點。好似我姊妹楠楠咁，以為自己揀到最適合嘅伴侶，但係最終做錯決定，後悔莫及。
話說楠楠原本有一個好穩定嘅男朋友阿洋，兩人拍拖三年，阿洋對佢呵護備至，而且隨傳隨到，唔少朋友都羨慕楠楠搵到一個咁好嘅男朋友。表面上兩人相處毫無問題，但實際上楠楠仍然對阿洋有所不滿。
原來阿洋喺床上有缺陷，性愛上滿足唔到楠楠，令楠楠得唔到性滿足，其實早前楠楠曾對我發過牢騷，但係我同佢講食得鹹魚抵得渴，阿洋對佢咁好，有多少缺點又算係啲乜嘢呢？可惜楠楠似乎聽唔入耳。
直到有一日，楠楠喺派對中結識到另一位男仔阿豪，呢個男仔帶畀佢好野性嘅感覺，結果佢哋當晚就上咗床，而阿豪嘅床上能力令楠楠一試傾心，此後兩個人過從甚密，終於有一次阿豪同楠楠行街畀阿洋撞破，呢段大好姻緣亦宣布結束。
幾個月後，楠楠同阿豪之間發生爭拗而分手，楠楠非常傷心，諗住搵我出嚟借酒澆愁，點知呢個時間，竟然收到阿洋嘅喜帖。依家楠楠不知幾後悔。計我話，佢既然咁樣做，就預咗有呢一日啦，咪話姊妹都唔幫佢呀！
娟娟