娟媽愈貼愈近，終於聽到兩人嘅對話，阿花娘親：「史Sir！今次真係唔該晒你！」史Sir話：「唔使客氣！一提起呢啲嘢，我就最精神嘅！」娟媽聽見：「九成唔慌係好嘢啦！」史Sir感覺背後有人，於是回頭一望，但不見娟媽嘅影子，不以為意。

阿花娘親問：「其實呢啲嘢點至叫做好呢？」史Sir一面正經：「一定要新鮮，摸落去要滑，唔好『巢晒皮』。」阿花娘親：「如果巢皮就唔好咩？」史Sir話：「巢皮就係老，呢啲嘢一老就冇人要啦。」阿花娘親：「我咁老，咁咪冇人要我？」史Sir話：「你生得咁後生，又點會冇人要呢？」阿花娘親一笑：「咁仲有乜嘢要留意架！」史Sir話：「就係凸出嚟嗰度，要生得尖尖細細，顏色最好係粉紅色，如果變咖啡色同黑色就唔得架啦！」阿花娘親猛咁點頭，但喺兩人身後有人磨拳擦掌。

各位聰明嘅讀者，大家估唔估到史Sir教阿花娘親做乜嘢呢？

選擇：

1. 去夜場搵處女

2. 去鴨店搵鴨仔

3. 去肉檔搵牛鞭

4. 去菜檔買子薑

答案：4. 去菜檔買子薑

解釋：阿花娘親有親戚生仔想買子薑，咁啱遇到史Sir，原來史Sir最有心得，於是相約去巿街買子薑，話明子薑，一定要嫩，唔好生出厚皮，所以要摸摸佢粗定薄，之後就睇薑芽位置，要又尖又細，有芽最好，顏色就要有少少粉紅色最佳，至於娟媽諗咗去邊，咁就冇人知道啦。

小德