撰文：賢

性感比併

較早之前，曾經同大家報道過美國出現唔少比堅尼洗車屋，只要車主駛架車入去，就有身穿性感比堅尼嘅美女幫手洗車，車主大可以安坐車廂，欣賞火辣誘人嘅洗車過程，如果想同美女有親密接觸，亦可以畀多少少錢同美女合照留念。

由於呢種比堅尼洗車屋可以為男士帶嚟無以上之嘅視覺享受，所以大受歡迎，漸漸仲傳到去歐洲各地，當中就以比利時最大行其道喇！有見及此，一間專門提供比堅尼女郎做騷嘅公司仲搞咗一個比堅尼女郎洗車競技賽，接受各地嘅性感美女上台表演洗車，實行將台下嘅男性觀眾全部辣㷫！即將舉行嘅洗車競技會喺10月3號於比利時上演，如果有心一睹洗車技術高超而又身材火辣嘅美女點樣洗車的話，大家就唔好錯過啦！

盡使奇招

洗車競技賽接受各地美女組成隊伍參加，由於每個美女都係精挑細選，樣貌一流之外，身材仲玲瓏浮凸，淨係企定定擺好S形姿勢都已經謀殺唔少菲林！不過，佢哋梗係唔會專心企定等影相啦！因為佢哋仲要洗車。而佢哋洗車嘅方法又實係與別不同，首先佢哋會一如平常咁帶住一桶水以及洗潔劑上陣，再利用海綿慢慢咁幫架車輕捽幾下。

洗得咁上下之後，生性豪放又搞鬼嘅美女就會愈來愈放肆，先係用水喉互相亂射，又或者索性將成桶水淋到成身濕晒，雖然唔會搞到三點透視而出，但係火辣嘅身材完全濕透，場面又真係幾誘人！但係點解佢哋要淋到成身濕晒呢？原因就係佢哋將會表演用身體洗車，一班洗得興起嘅囡囡大部分都有一對大海綿於胸前，淋濕之後，就會用呢對大海綿喪擦車身！挑逗意味真係強到冇得頂！另外，亦有部分長腿囡囡會抬高一腿於車身來回掃蕩，總之整個洗車競技當中，大家將會睇到聞所未聞嘅洗車奇招。

免費洗車

由於每次洗車競技都有咁多靚女出盡奇招，引發充滿挑逗味道嘅場面，所以吸引到大量男士入場支持，當中不乏有車階級。如果閣下有揸車到場，而座駕又係頗為名貴嘅車種的話，咁你就有運行喇！

因為，台上表演嘅隊伍為咗增加睇頭，不時都會邀請台下嘅名車車主借車一用，有美女免費幫手洗車固然開心到極點又慳番唔少工夫啦！不過，最開心就係美女為咗答謝車主出車相助，會獻上香吻，甚至拉埋車主上台，一邊洗車，一邊幫車主洗身，絕對係一種非凡享受！就算畀佢哋搞到成身濕晒都抵啦！當然，如果部車係開篷車的話，就唔好輕易答應喇！