佢師傅平哥解釋：「囡囡諗住拋個身出嚟做，就會去東莞搵食，但就算天姿國色都好，佢哋一開始，都唔會去大場做。」明仔問：「點解呀？」平哥解釋：「因為佢哋落得嚟做小姐，通常都係仙都唔仙吓嘅窮光蛋，身上有一兩百人仔已經好有米。」

明仔：「就係冇錢，更加要去大場做小姐，等佢哋可以搵多啲嘛？」平哥一笑：「你估啲大場話入就入咩！無論做小姐定係技師，全部入職都要畀押金，即係保證金，另外如果要做桑拿技師，又要交培訓費，做三陪就要交置裝費。」

平哥冇講錯，一般大場嘅囡囡，要入職就要畀幾千蚊押金，話就話係公司收，但實際係經理大班收嘅錢，收佢哋咁大筆錢，目的等啲囡囡唔會亂嚟，聽聽話話，如果唔合作唔聽話，就扣你押金，由於都幾大筆錢，所以囡囡至會咁乖。

另外，仲有培訓、置裝等等雜費，期間公司包食宿，但你都要有生活費，所以囡囡身上冇五六千喺手，你都唔使旨意入到大場做小姐，於是剛由鄉下出城嘅囡囡，就只有先喺髮廊打躉，搵到所需嘅費用之後，先至可以入大場賺大錢，完成夢想。

最後平哥再提醒大家：「所以喺髮廊執到好嘢一啲都唔奇，但真係要小心佢哋手腳唔乾淨。」

小德