偷閒做愛

意大利人不嬲對性嘅質素都十分注重，高潮只不過係基本需要，當地人熱情如火，喜愛做愛多過做工，最近唔少白領人士流行喺午飯時間抽空做性愛運動，以紓緩工作壓力之餘，亦避免工作時間太長而影響性生活。不過，午膳時間有限，若然駕車去酒店開房嘅話，未免太過費時，於是佢哋就索性將汽車作陽台，食個「快餐」先回到工作崗位。而性愛停車場就係呢班好性一族嘅常到之地。

每逢中午時間，就會見到一架架汽車駛入停車場，之不過你唔會見到有人落車，反而冇幾耐就會見到停泊嘅汽車突然上下震動，相信唔需要多講都知發生乜嘢事。

見怪不怪

其實食「快餐」唔係問題，之不過都要做足安全措施，若然喺停車場泊好車先發現身上一個安全套都冇，難道白行一趟？咁又未必嘅，皆因喺收費處附近，通常都會見到一啲自動售賣機，所銷售嘅貨品有零食、飲品，仲有各式各樣嘅安全套，對情侶嚟講確實非常方便。

一時之間，停車場內都泊滿汽車，大批男女分別於自己嘅私家車內奮力作戰，相信呢個景象一定非常壯觀，唔講唔知，原來車廂交歡嘅情景，當地人早已見慣見熟。有成人網站調查顯示，車廂係意大利人最喜歡嘅性戰地點之一，更曾有成人雜誌為呢類性愛停車場作出排名，以燈光、安全度及基本設施為準則，一旦獲得最高評分，每夜都會擠得水洩不通。

收費昂貴

據講，有時部分地區治安唔好，為免影響生意，於是有停車場老闆索性聘用保安隊，保護嚟泊車嘅男女，讓佢哋可以安心作車廂戰。此外，由於停車場嘅人流多咗，竟帶旺埋附近嘅商店生意，如餐館、便利店、情趣用品店等。有部分店舖老闆表示，希望可以增設一啲多層式性愛停車場，等佢哋做多啲生意咁話。

至於收費方面，露天性愛停車場收費並不便宜，每小時一百歐元，比起普通停車場收費貴得多，如設有保安站兼有蓋嘅話，收費更為昂貴，就連場內附設嘅廁所，亦要收取一歐元，抵唔抵玩真係見仁見智。

撰文：娟娟