據一位陳姓男士表示，佢從報章上睇見一個交友嘅廣告，打電話查詢過後，就親身去工作人員提供嘅地址。當佢按照門牌號碼搵到公司所在地時，發現該公司外並無招牌，內裏只係一間約十多平方米嘅辦公室，入到去就有一位叫阿紅嘅女職員出嚟接待佢，閒談兩句，阿紅就拎出一本貼有妙齡女性相片，並附有個人簡介嘅小冊子畀佢睇，同時佢又話，如果睇啱任何一個女仔，即可馬上代為聯絡，不過佢向陳先生清楚表明，要識女仔就要先繳付二百元介紹費，而且只係一次咁多，若然想識多幾個女仔嘅話，就要付上五百元入會。

於是，陳先生喺揀咗其中一個任職寫字樓工作嘅女仔，然後繳付二百元介紹費，阿紅先聯絡對方，然後安排陳先生喺附近一間餐廳見面。十多分鐘後，嗰個女仔出現，佢向陳先生表示，現時喺深圳一家公司做高級文員。言談間，陳先生發現與想像嘅完全兩回事，因為對方直言只希望同佢做性交易，肉金每次七百元。得知對方嘅目的之後，陳先生當堂冇晒興趣，當佢準備離開之際，對方竟死纏爛打要求陳先生付小費，為免惹上麻煩，無奈嘅陳先生畀咗一百元對方先得以脫身。

娟娟