「歡場無真愛」呢句說話，好多人都聽過，之不過仍然有大把男人去夜場玩嗰陣，總係懷有一種戀愛嘅期望，而且經常錯覺服侍自己嗰個小姐會愛上自己。當然，夜場小姐唔係冷血，佢哋一樣有感情，遇上合眼緣嘅男人，內心亦會產生感覺，但係佢哋都相當專業，開工時對客人溫柔，旨在氹對方開心，望佢哋多多捧場。老友肥仔賢係滾友一名，經常北上尋歡作樂，佢一直以為做得夜店嘅女仔，通常都係好空虛、寂寞，非常容易得手，但事實並非如此之餘，佢反而墮入感情陷阱。話說肥仔賢早排同朋友到深圳飲花酒，期間遇上一個妙齡女郎，得知對方身世可憐，當堂激發起佢嘅「博愛」精神，以為幾句甜言蜜語就可以將對方冧掂。事後，呢個女仔仍然頻頻搵肥仔賢，兩人好快就發展成情侶關係，肥仔賢以為呢個女仔對佢動真情，先至咁順攤同佢一齊，其實動真情嘅人，由始至終只得佢一個。
喺拍拖期間，肥仔賢不時北上搵呢個女仔，由一星期兩日，後嚟增加至一星期五日，最後仲索性喺深圳租屋住，話方便同個女仔開心吓喎！過咗兩個月，對方終於露出狐狸尾巴，佢因周轉不靈，向肥仔賢借咗一萬蚊，不出三日，嗰個女仔已經失咗蹤，除咗電話停止服務，就連深圳間屋裏面所有家電都畀人搬走埋。
老實講，損失財物事小，若然對方強行勒索，到時真係有排頭痕。當然，唔係話所有人都不懷好意，但人心難測，大家應小心為妙。
娟娟