小娟今日同阿花去旺角買嘢準備開學，點知由港鐵站出嚟，就畀幾個年輕帥哥攔住，帥哥甲搶先搭訕：「兩位靚女要去邊度呀？」小娟極之不悅：「關你乜嘢事呀？」帥哥甲：「冇嘢！見係靚女，先至多口關心吓啫！唔使咁扯火嘅？」
阿花似乎受唔住帥哥誘惑，竟和顏悅色咁回答：「我朋友係粗魯啲，你哋千祈唔好怪佢！」帥哥乙：「都係呢位小美女通情達理！」阿花畀人一讚，面都紅晒一面冧樣，帥哥甲又話：「睇你兩個，係咪有啲煩惱呢？放心，我哋一定可以幫到你。」小娟：「我使乜你哋幫呀？」帥哥乙：「唔怕話畀你知，你哋想要嘅嘢，我呢度有，而且保正正貨，畀喺大場買嘅仲要好，而且價錢仲平一半咁多。」阿花一聽有平嘢，就異常興奮：「平一半咁多？」小娟：「平嘢冇好，啲貨咁平都唔慌好嘢。」帥哥乙：「兩位靚女即管放心，我哋啲貨全部第一手，啱啱到咗冇耐，可以話新鮮熱辣，你哋啱嘅我就帶你哋上去睇吓，睇過唔啱，一個仙都唔收你。」阿花：「咁我哋上去睇吓！」小娟低聲：「你都夠膽啦，轉頭暈咗喺街上點算？」
各位聰明嘅讀者，擺明小娟又誤會咗阿花，究竟阿花要買嘅係乜嘢呢？
1.軟性毒品
2.自慰用品
3.二手課本
4.裸男服務
答案：3.二手課本
解釋：佢哋兩個去旺角就係去買新書準備開學，手持書單一出港鐵，就畀一啲游說買二手書嘅帥哥截住，阿花係聰明人，自然明白班帥哥講乜嘢，小娟較直，仲以為佢哋游說阿花去買丸仔，所以當阿花答允上去睇吓啲二手書好唔好嘅時候，小娟仲以為係去試毒品，咁大個烏龍都搞出嚟，真係服咗小娟。
小德