大婆定標準

據梁瑋鈞師傅講，古時女性所謂天生二奶相，據相書講要符合所謂「八小」先至算數，就係面小、眼小、鼻小、口小、耳小、額小、聲小同埋身材小，但呢個所謂二奶嘅相學標準，其實只係滿足大婆嘅要求而定。

原來喺相學嚟講，五官偏大偏細都唔好，適宜唔大唔細，如果女性擁有「八小」嘅特徵，咁佢條命想唔寄人籬下，受盡苦頭都唔得，例如口主享樂、溝通，如果嘴巴太小，就會只知吃苦，而且唔識同人溝通，乜都要聽晒大婆嘅話，任由佢嚟擺布。

梁師傅話，眼主能力和決斷力，大眼嘅人辦事能力強，而且好有決斷力，喺古時一個大家庭當中，只能大婆一人獨大，所以妾侍一定要眼細細，等佢哋冇乜嘢辦事能力同決斷力，咁就冇人會同大婆爭攞大鎖匙，影響佢喺屋企裏面嘅管治地位。

專揀孤苦相

另外選二奶一定要額頭窄小，原來都係大婆嘅意思，因為額頭表示祖蔭助力，如果女性額頭飽滿開闊，就表示祖上有啲勢力，就算做小妾，佢哋外家都有能力可以指指點點，影響大婆嘅威信，所以搵啲額小冇人冇物嘅二奶，先至畀佢入門。

身材方面要瘦小，明顯有違納妾嘅原意，就係要開枝散葉，古人話要娶身材圓潤肥大嘅女性，就係貪佢哋能生養眾多，但大婆竟然要挑一啲身材瘦小嘅女性入門，就係唔想佢為丈夫再開枝散葉，免得將來分家，又多一房子孫出嚟分薄晒自己嗰份。

另外，要選一啲聲音細小嘅女性入門，明顯又係大婆嘅意思，聲音表示自信心同魄力，一般聲大嘅人魄力十足，自信心爆棚，但如果係聲音嬌小嘅人，就表示魄力唔夠，做嘢欠缺自信，同人鬧交，更一定輸實，難怪大婆一定要揀佢哋入門做二奶。

上下大逆轉

睇番「八小」嘅特徵，真係衰其中一瓣都唔掂，古時仲要人哋八樣齊晒，正如梁師傅咁講，真係苦命到不得了，唔寄人籬下，簡直生存唔到落去，但今時今日嘅二奶，佢哋又係乜嘢嘅相呢？原來乜嘢相嘅女性都有可能做人哋嘅二奶！

梁師傅話：「以前啲女性，讀書唔多，又冇謀生技能，係無路可走嘅情況下，先至做人二奶。但今時今日嘅女性，做人二奶已經唔再係為咗生存，社會上不知幾多專業婦女，都做人二奶，所以只能解釋現在絕大多數女性都係為咗滿足擁有欲。」

有冇方法睇出佢哋呢？師傅話只要將「八小」反過嚟睇，擁有「八大」特徵嘅女性，就係現今主動型二奶，佢哋有能力、有自信，對性、情愛同家庭都懂得要求，估唔到數千年嚟大婆所佔嘅上風，到咗依家要大逆轉，大婆遇上佢哋，必定注定失敗。

撰文：小德

鳴謝：玄學家梁瑋鈞