開房解決慾火

有人會問，點解啲學生偷食要開房咁麻煩呢？據一名畢業生阿榮講，原來學校嘅宿舍，一到暑假就會睇得好嚴，唔好話男女生唔可以互入對方宿舍，連同性學生，但係住唔同大樓嘅都唔畀亂入，點解一到暑假就睇得咁嚴？阿榮話同保安有關。

原來一到暑假，好多廣州嘅學生就會返屋企，宿舍少咗大半人，保安自然唔睇緊啲都唔得，所以閒雜人等，唔係住大樓內嘅人，一律唔可以入內，於是一啲冇返屋企，特別係外省嚟嘅學生情侶，要親熱吓，就要出去旅館開房。

阿榮補充話：「就算畀你屈蛇入到去宿舍，但天氣咁熱，宿舍又冇冷氣，又冇得沖涼，親熱起嚟都好唔方便，於是啲慾火攻心嘅情侶，就會去附近嘅城中村，搵啲九流旅館開房搞掂，日間租四個鐘都係幾十蚊，夠晒經濟。」

冇登記罰幾百

而且呢啲九流旅館，只要男仔攞個學生證出嚟登記一下就可以，認真方便快趣，但內地唔係規定入住註冊旅館，要所有人都登記個人資料咩？阿榮話：「有註冊嘅旅館就係，好似廣州嘅大學城區于貝村一帶的民辦旅館，有好多都係無牌經營嘅。」

而據當地記者調查所得，好多就算註冊咗嘅旅館，亦會貪方便只登記男仔一個人嘅資料就算，女仔就會好少理，所以呢啲旅館，自然成為大學生嘅「偷情聖地」，至於點解咁夠膽漠視法例，唔通佢哋呢啲老闆背後有大人物撐腰？

原來唔係，據有關規定，旅館嘅工作人員，唔記得登記客人嘅個人資料，只會罰二百元以上、五百元以下嘅罰款，咁冇阻嚇力，佢哋當然隻眼開、隻眼閉啦！但呢啲城中村嘅旅館，好多都係由村屋改裝而成，無論服務、裝修、設施都會差出面好多。

分享開房心得

由於家陣啲大學生冇乜經濟問題，於是有啲要求嘅同學，就會離開大學城區，返入巿區搵旅館幫襯，特別係一啲連鎖式經營嘅經濟酒店，就最啱晒佢哋嘅口味，事關大都全新裝修，而且格調高雅，有啲設計上根本就似炮房。

而且呢啲連鎖酒店一樣有時鐘房供應，租幾個鐘嚟「偷食」，往往一百蚊有找，而且有啲仲可以喺網上或者透過電話嚟預訂，客人亂作個名同寫個證件號碼，只要先過數，到時去櫃枱講個名，唔使再登記，就可以攞鎖匙上房，認真夠晒方便。

報道話情況十分嚴重，由於旅館冇嚴格執行入住登記嘅守則，所以擔心未夠18歲嘅少女會亂搞男女關係，但你有你擔心，有啲大學生更喺討論區，大談「爆房」心得，細數邊間旅館最啱「開房」之用，所以話家陣啲大學生，真係離譜到你唔信呀！

撰文：小德