小娟去老人院探訪原來仲有下文，上一回阿伯有癡呆症，嚇到小娟雞咁腳走，但由於探訪時間仲未完結，於是護士又帶佢哋三個去另一間房，探望一個婆婆。婆婆十分健談，但講嘢鄉音甚重，小娟用盡佢哋所識嘅兩文三語都唔係聽得好明。
但婆婆十分好客，仲喺床下底攞咗罐曲奇餅出嚟，肥然大喜，婆婆每人分咗幾塊畀佢哋食，但小娟發現餅罐上嘅到期日係2007年，即係過咗期兩年，於是示意阿花把餅乾全交給肥然處理，肥然食得津津有味。阿花見到婆婆床頭上年輕時嘅相片。
阿花：「婆婆你後生時好靚女呀！」婆婆話：「我以前真係幾靚女㗎，好多帥哥追求我，佢哋一見到我對乜，個個都會暈晒大浪。」（「乜」係鄉下話）阿花攞起幅相一望，讚嘆：「婆婆你對乜，真係又圓又大喎！」婆婆話：「你哋想唔想都咁大吖！」
阿花同小娟馬上點頭，婆婆話：「只要按摩吓佢就可以。」小娟：「點樣按摩呀？」婆婆話：「用手順時針打圈搓三十六下，之後逆時針搓多三十六下，就會變得又圓又大，婆婆入老人院少搓咗，先至墜晒落嚟之嘛！」肥然一笑，成口餅碎射出。
各位聰明嘅讀者，大家又估唔估到婆婆教小娟佢哋搓乜嘢呢？
選擇：1. 乳房 2. 眼睛 3. 膝蓋 4. 拳頭
答案：2.眼睛
解釋：原來婆婆同小娟講嘅就係佢對眼睛，婆婆係潮州人，潮州話中眼嘅發音類似「乜」。婆婆年輕時雙眼又圓又大，吸引唔少帥哥追求，而保養嘅方法，就係同佢做按摩，雙眼一直靚到幾十歲，近年入咗老人院，佢冇再按摩，啲眼皮咪墜晒落嚟囉，睇嚟肥然唔知諗錯乜嘢，搞到小娟一頭都係餅碎。
小德