即席煮有機菜

喺東京池袋，早前開設咗一間名為「沙律吧」嘅有機風俗店，有機嘅意思並唔係指裏面嘅風俗娘個個都奉行有機飲食主義，而係佢哋都會安排客人透過有機生活促進健康，更加標榜以挽救男士生殖能力為目標。據負責人松山表示，店內嘅風俗娘並唔係見錢開眼、只想客人盡快完事就收工嗰種，而係希望幫助每個客人玩得開心之餘，又能夠得到健康。

松山話：「其實早幾年日本已經開始流行有機飲食，但主張有機嘅風俗店相信只此一家，有機食物係指一啲利用有機方法種植同培養嘅食物，例如菜種本身冇經過基因改造，種植時亦要用天然肥料同天然驅蟲劑。至於飼養牲畜亦一律放棄激素催生，以及採用並無基因改造成分嘅飼料，冇毒、冇激素，所以有機食物對人體更有益。要知道，男人擁有強健嘅身體，先可以保持性能力，而店內不但會教授大家有機飲食對性能力帶嚟乜嘢幫助，以及精選極有營養價值嘅有機餐單，更可以安排風俗娘即席煮番餐有機菜畀大家食，總之玩得健康啦！」連去滾都要講健康，睇怕只有佢哋先諗到！

專業培訓

一般風俗娘，例如係陪浴娘，要培訓佢哋可謂一絲不苟，先由資深陪浴娘教授技巧，再嚟就要實地視察前輩點樣服侍客人，之後仲要經過測試先可以成為正宗陪浴娘。

呢間有機風俗店旗下嘅風俗娘同樣要經過嚴格訓練，然而招呼客人嘅技巧只屬其中一個範疇，店方主要教佢哋有關健康飲食習慣、營養學知識、健康推拿手法、穴位按摩等等，甚至連中醫嘅面色觀察都要略懂一二，因此，風俗娘先可以判斷到客人嘅健康狀況，提供最有效促進健康及改善性能力嘅方法，令佢哋幫襯本來唔健康嘅風俗店服務，都可以變得身體健康啲！

回復勇態

另一方面，呢間風俗店推行一站式服務，經過專業培訓嘅風俗娘會同客人進行一個面對面傾談，了解客人嘅身體狀況、飲食習慣等資料，然後風俗娘就會根據情況安排有機飲食餐單。當然佢哋亦唔會強迫客人花時間進行健康評估，只係認為家吓好多男士都因為飲食習慣及缺少運動等問題，導致性能力下降，而有機風俗娘則可以為佢哋提供一連串服務，用健康飲食，以及聲稱能夠令男士雄風再現嘅推拿按摩，再次生機勃勃。據講，唔少中年男士都因為得到有機風俗娘幫助，以及戒除不良習慣之後，身體健康咗之餘，性能力下降問題亦有明顯改善，之不過係咪完全關囡囡嘅事就見仁見智喇！

肥膩食物 影響性能力

陽痿係每個男人都唔想遇到嘅問題，但偏偏喺好多人身上發生，更以為服食壯陽藥有一定幫助。其實要徹底解決問題，反而應該從基本嘅生活習慣同飲食入手。據意大利一位生物醫學學院嘅教授表示，男性陽痿除咗同生活壓力及吸煙有關之外，戒除不良飲食習慣亦係非常重要，佢指出，烤肉、燒鵝、香腸和煙肉等肥膩食物，長期食用會影響身體健康，同時亦對男性嘅生殖能力帶嚟負面影響，令佢哋較難動情。唔想咁快就陽痿，平時記住食得清淡啲喇！

撰文：娟娟