話說任職司機嘅阿堂早排同兩個老友到咗東莞一間夜總會玩，期間有囡囡話肚餓，要食飽先有力做，於是阿堂就提議一齊出去食番餐，並表示由佢請客，認真豪氣。

佢哋一行六人去到夜總會附近一間酒樓，阿堂諗住出得嚟玩，使少少梗要，於是叫幾個女仔點菜，點知佢哋聽見之後，竟然連續不斷叫咗十多樣菜式，阿堂本來都有啲介意，但見到大家咁高興，為免破壞氣氛，惟有啞忍。點知上菜嗰陣，三個囡囡竟然好似餓鬼投胎咁，瘋狂爭食，唔講仲以為佢哋十日未食過飯，最抵死就係佢哋除咗大食之外，仲自作主張嗌咗幾樽啤酒，飲咗幾杯，在酒精影響下，當堂現形，變得毫無儀態，有囡囡更原來係粗口王。睇見呢幾位「人間極品」，阿堂不但冇晒胃口，簡直完全冇晒性趣，嬲起上嚟，放低三百蚊就嬲爆爆咁離開，一個人去咗按摩。

事後，阿堂打番電話畀老友「耍冧」，並講解當時情況，點知老友反而仲「忟」過佢，事關當晚阿堂走咗之後，三個囡囡竟一邊食一邊鬧阿堂孤寒，得三百蚊唔夠食喎！兩個老友聽見當堂火都嚟埋，於是展開一場罵戰，最終不歡而散。

或者各位老友出嚟玩嗰陣都曾遇過類似嘅情況，唔想冇癮收場，建議同囡囡溝通多啲，發現對方唔啱嘴形嘅話，咪索性換咗佢唔使愁囉！

娟娟