紓緩壓力

每個人都有壓力，而水着女優都唔例外，每日除咗要應接大量嘅拍攝工作外，仲要保持上佳嘅狀態，都咪話唔辛苦！為咗紓減壓力，有女優選擇彈琴唱歌，亦有女優去旅行減壓，不過學似松本妹同鈴木妹咁，以打拳作為減壓方法，就認真少見！點解佢哋會愛上呢種咁特別嘅運動呢？松本妹表示：「其實我以前冇諗過會做呢啲咁激嘅運動，因為我擔心自己嘅體力應付唔嚟，但喺一次電視台拍攝工作，接觸過拳擊後，發覺並非想象中咁辛苦，仲有不少職業女性參加，從此愛上咗呢項運動。」

唔知拳擊帶畀松本妹乜嘢好處呢？松本妹就話：「作為水着女優，工作壓力非常大，而壓力更會令皮膚變差。不過接觸呢項運動後，當有壓力嘅時候，我可以對住沙包發洩一番。有時覺得未夠喉嘅話，甚至會同教練對打，雖然畀人打到會好痛，但卻可平衡心理。」

鍛煉身體

松本妹鍾意拳擊，而另一位性感水着女優鈴木茜，閒時亦鍾意郁手郁腳，而佢最鍾意嘅運動竟然係自由搏擊。鈴木妹笑道：「好多人第一次聽到我玩呢項運動時，都會露出驚訝嘅神情，因為佢哋見我身材唔算高大，冇諗過我會玩啲咁激烈嘅運動。事實上，我玩咗呢項運動已經有三年。記得當初玩自由搏擊時，只係為咗自衞防身而已，學番一招半式，咁就唔使怕色狼埋身。其後發覺呢項運動唔單止可以防身，仲可以強身健體，讓多年飽受呼吸道問題困擾嘅我，病情得到好轉！」

不過鈴木妹唔怕咁好打會嚇走追求者咩？鈴木妹大笑道：「摶擊技巧只係用嚟防身，絕對唔會用喺追求者身上，相信佢哋冇飽受我老拳嘅機會。不過話說回來，如果追求者死纏爛打，搞到我不勝其煩嘅話，相信到時我要出絕招都未定。」

順便睇仔

原來兩位靚女平時喺拳館，除咗習武外，仲鍾意睇仔，好似松本妹咁，就曾經因為睇仔而被教練責罵。松本妹笑道：「因為拳館嘅男學員，喺練拳嘅時候都鍾意赤膊上陣，而佢哋練到一身肌肉，梗係會望多兩眼。記得當日拳館嚟咗個新學員，佢不但生得靚仔，而肌肉更係非常結實，令我不其然產生幻想。教練見我望住靚仔眼都定晒，於是咪話我唔專心囉！」

聽到松本妹咁講，鈴木妹竟點頭道：「其實我都經常係咁，好多時候見到靚仔拳手時，都會忍唔住望多幾眼。其實咁做法又唔可叫做分心，呢啲只不過係人之常情啫！不過我唔單止會睇，有時仲會主動走埋去同佢練習番場添！當然練拳只不過係藉口，目的只係想界佢而已。」唔知大家有冇興趣，同鈴木妹一齊練拳呢？大家有冇興趣，同鈴木妹一齊練拳呢？

松本沙由紀小檔案

出生日期：1985年12月9日

身　　高：172cm

三　　圍：36G、24、35

血　　型：AB型

興　　趣：格鬥

鈴木茜小檔案

出生日期：1984年4月2日

身　　高：166cm

三　　圍：35E、23、32

血　　型：B型

興　　趣：自由搏擊

撰文：阿豪