學生實習

每年五月開始直至國慶後，都係內地演唱會嘅高潮期，唔少國內外嘅歌手都會四出登台演出，於是急需大量舞蹈員，佢哋平時冇嘢做，就會「落班」，即係搵間大型夜總會做舞蹈員演出賺錢，特別係冬天嘅時候，但旺季一到，佢哋就會紛紛離開。有夜場老總形容佢哋係候鳥，一夠時間就走人，唔理出面夠唔夠嘢食，個個都要冒死出外闖闖。

夜場突然冇晒啲經驗舞蹈員，咁點算呢？大家又唔使驚，每年四月開始，各地嘅藝術學校就有大把學生要求實習嘅機會，實習期一般半年時間，啱啱好填補舞蹈員嘅真空期，原來內地啲職業學校一般讀兩至三年，最後一年就係實習，如果實習表現好，先至可以攞到證書，所以學生都會好緊張實習，而去邊度實習就係由學校安排，夜場答允接受學生實習，就要提供食宿。

游說客串

每個學生都有比巿價低嘅工資，但呢啲工資通常都會畀學校或者負責人落晒格，於是學生都變為「有食無工」，由於夜場畀足錢，所以都唔會點同你客氣，十點左右要起身綵排，或者練習新節目，一直到四點就準備演出，六點前就要換好衫等演出。夜場一般演出時間係由七點半開始，未有歌星就由佢哋跳住舞先，通常演出到十一點鐘左右，有啲夜場仲會演出到半夜一點，如果夜總會有的士高嘅，就會派啲囡囡去做領舞員，一直要跳到零晨四五點至可以收工，真係畀柴九哥仲要辛苦。

有人會擔心啲純品女學生，會唔會畀人捉咗去賣淫呢？呢層大可放心，逼良為娼嘅事，喺啲有表演節目嘅大場都比較少發生，但場入面嘅媽咪，就會極力游說啲囡囡出嚟客串做三陪，當佢哋演出之後，就安排入房陪客人飲酒、唱歌、猜枚。

勢難避免

當啲囡囡坐一晚收幾百蚊小費嘅時候，佢哋自然會覺得做三陪好搵過做舞蹈員，而據媽咪透露，每年大約有三十個囡囡嚟實習，當中有六成人客串做過三陪，而六成人中更有一半人做咗三陪之後就唔想再跳舞，可想而知佢哋嘅生活，真係天堂與地獄。

以前有食冇工，勉強可以過活，但今時唔同往日，你有食無工，啲囡囡一定要靠父母供養照顧，但如果家境清貧，佢哋就只可以過住地獄般嘅生活，於是最後都會受唔住誘惑，答允客串做三陪小姐，由於絕大部分嘅囡囡，都係有志藝術發展，所以都會堅持賣藝不賣身，或者每個月只做幾晚，搵千零蚊使用就唔做，希望盡快捱過實習期，可以正式賺取工資，但其實佢哋只要仍然喺夜總會行業工作，呢啲誘惑一定會接踵而來，難怪佢哋啲師姐定期要做候鳥，可能就係唔想畀自己沉淪落去。

撰文：小德