前兩日有班朋友返內地玩，一行人當中，只得一個朋友有艷遇，認真羡慕死人，事後有朋友問我，可唔可以從心理測驗中，預測自己異地艷遇率有幾高，如果你都想知的話，不妨試試以下心理測驗。
問題：你開車正前往一個目的地，但途中發現就快用晒啲汽油，咁你會點做？
答案：1）繼續向前，直至冇油為止。 2）停車唔郁，等候別人救援。
3）駛返轉頭，搵最近嘅油站。
解釋：
1. 敢作敢為
呢種人充滿冒險精神，敢作敢為，在異地艷遇機會有六成咁高，但因為太過主觀，所以呢啲艷遇，九成唔會再有下文，甚至變成孽緣。
2. 隨遇而安
呢種人樂天知命，隨遇而安，但其實佢早有準備，將僅餘嘅油留作不時之需，喺異地有九成機會有艷遇，生性風流，深得女士嘅歡迎。
3. 有頭冇尾
呢種人做事有頭威，冇尾陣，艷遇率只得三成，就算有靚女投懷送抱，最後都會食白果，所以做佢哋嘅女朋友，完全可以放一百個心。
小德