喺公開考試期間，每日都有好多其他學校嘅學生到小娟嘅學校應考，所以每日小娟同阿花返到學校都會第一時間喺校門佔據有利位置，睇吓啲考生中有冇靚仔出現。可惜睇咗十幾日，日日都令佢哋失望，今日阿花放棄，決定早啲返課室坐吓好過。小娟本來都想投降，但唔想第一個提出，見阿花提出咗放棄，於是教訓佢一頓之後，諗住扮晒嘢堅持多一日，第二日放棄就唔使做衰女。點知今日傳說嘅「花樣男子」終於出現，一嚟仲嚟咗四個，個個高大威猛，靚仔到不得了，小娟睇到眼定定，仲連口水都流埋出嚟。
四個靚仔見到小娟，竟然走埋佢身邊，問佢廁所喺邊，小娟抹抹口水然後話畀佢哋聽，但四個人似乎唔明白，於是小娟自告奮勇帶路，其他女同學見到小娟一拖四，個個都露出羨慕嘅眼光。小娟帶到佢哋去門口，四人即時衝入去，突然有人伸手出嚟拉咗小娟入去，小娟定眼一望，四人圍住小娟，其中一個哄埋小娟面前：「小姐！我忍唔住啦，快啲畀我！」小娟合作地合埋眼嘟起嘴，靚仔奇怪道：「你做乜呀？」
各位聰明嘅讀者又猜唔猜到，呢位靚仔同學，要小娟畀啲乜嘢佢呢？
1. 想要小娟寶貴嘅貞操 2. 想要小娟借一千幾百
3. 想要小娟借幾張紙巾 4. 想要小娟介紹女朋友
答案：3. 想要小娟借幾張紙巾
解釋：好明顯呢四個同學因為早餐食錯嘢，於是急住搵洗手間嚟方便一下，但係為咗形象，喺外面仲保持風度翩翩，一入洗手間就急不及待，呢個時候竟發現廁所冇廁紙，於是拉小娟入嚟問佢有冇紙巾。由於實在太緊急，一切都解釋唔切，先至令小娟產生誤會。
小德