喺現實生活中，確實好難遇到一位樣靚身材正嘅索女，尤其係對於一班宅男，佢哋終日匿埋喺屋企，沉醉於虛擬世界，結識索女嘅機會可以話相當微。於是，日本好多電玩製作公司都會推出一啲以性感女郎作主角嘅遊戲，一來吸引男士玩家，二來令呢班宅男有番啲精神寄託。
當中比較受歡迎嘅電玩，不得不提《異域傳說》（Xenosaga），事關遊戲中有個充滿智慧嘅女機械人，名叫Kos-mos，不但係一個超級美女，而且擁有令男人噴血嘅迷人身材，因而深受一眾電玩迷歡迎，甚至視佢為性感尤物添。
而呢個Kos-mos手辦模型則以第三部曲《異域傳說3：查拉圖斯如是說》中，手持重型槍械嘅造型設計。當中有兩個特色，一係配件非常多，計有重型機槍、盔甲、頭罩等；二係Kos-mos嘅秀髮以半透明物料製造，令視覺上別有一番味道。此外，跟同類型產品比較下，模型嘅手工更見精巧，雕功亦非常細緻，玩家更可隨自己心水加工塗色，實在係上佳嘅作品，令人愛不釋手。
售價：7,140日圓（約HK$569）
娟娟