一位署名「心急人」讀者來信談及：「我同丈夫結咗婚四年，一直性生活十分滿意，但最近半年，丈夫經常中港兩地咁飛嚟飛去做生意，佢每次返嚟都會同我親熱，但我總係提唔起勁，好似突然變咗性冷感咁樣，究竟發生咗乜嘢事呢？」
好明顯「心急人」係受到心理影響，導致性生活出現問題，主要原因係丈夫經常兩地做生意，擔心佢會喺內地拈花惹草，令大家感情變差。更嚴重嘅，擔心丈夫花天酒地之後，身上染有性病，回家再同佢親熱，就會產生極度厭惡嘅感覺。其實呢種情況，有好多丈夫經常不在身邊嘅女士都會發生，要對付呢個心理病，一定要同丈夫開門見山講清楚。當然，丈夫清白嘅話，聽見一定會好嬲，但佢點嬲都好，亦需要佢明白你個心出現憂慮，要大家諗辦法解決，但諗嘅辦法一定要係積極嘅。
一啲負面嘅說話則千祈咪亂講，免得令兩人嘅關係變壞，只要大家坦誠溝通，唔難將太太嘅憂慮清除，做太太嘅記緊不要將憂慮一個人嚟承擔，因為只會愈諗愈壞，鑽咗牛角尖就會走唔返出嚟，問題一解決，性生活自然會回復和諧。
陽起子