撰文：小德 攝影：強
同居齊煲
呢兩位電視迷都係嚟自澳門打×1浴室嘅靚女技師，佢哋一個係21歲嘅小倩，而另一個就係20歲嘅小芳，兩個都係樣靚身材好，而且揼骨技術一流，所以每日都有唔少Fans搵佢哋，簡直由朝忙到晚，根本冇乜時間喺休息室，更唔好話有時間去煲劇。
但原來佢哋一收工，就會拿拿臨返屋企煲劇，本來兩個唔同住，不過知道咗大家都係煲劇嘅狂熱分子，於是集中資源，住埋一齊，夾份買DVD機同劇集光碟，為咗慳時間，佢哋喺公司食埋宵夜至收工，返到屋企就全程煲劇，煲到再返工為止。
係咁煲劇，佢哋唔使瞓嘅咩？小倩話：「我哋都會瞓，喺公司有休息時間，所以我哋每晚只瞓三四個鐘，其他全部時間都會攞晒嚟煲劇。」點解咁大癮要煲劇呢？小芳話：「煲劇係最平嘅娛樂，買套碟可以睇幾日，幾抵呀！」
愛情元素
咁兩位最喜歡睇啲乜嘢題材嘅電視劇呢？小倩話：「我哋嘅口味都差唔多，悲情嘅電視劇我哋就最啱心水，婆婆媽媽，喊苦喊忽嘅我哋就最鍾意，跟住就係時裝愛情偶像劇，睇住啲靚仔靚女嘻嘻哈哈，有時真係愈睇愈開心，乜嘢煩惱都會唔記得晒。」
小芳補充：「古裝同埋武打我哋都幾鍾意，因為話就話係歷史或者武俠劇，但其實好多時都加插大量愛情元素落去，纏纏綿綿，都幾好睇㗎！」講嚟講去最緊要都係有愛倩嘅元素，但你哋日煲夜煲，邊有時間去拍拖享受愛情呀？
小倩話：「呢層我就冇諗過，但我相信我嘅愛情嚟到時，我自然會少啲煲劇，多啲陪我嘅男朋友。」至於小芳就話：「我就會揀一個同我有共同興趣嘅男朋友，一於有劇齊齊煲，有時煲劇當拍拖，咁就唔會有人投訴邊個陪唔到邊個啦！」
開房煲劇
同小芳拍拖只係煲劇，似乎悶啲喎？小芳話：「如果怕悶嘅，我哋可以開間房去睇，咁就包保佢唔會悶啦！」出動埋開房煲劇呢招，相信冇男朋友會反對，但小芳千祈咪一邊煲劇，一邊同男友親熱喎！至於小倩又會唔會用呢招嚟對付男朋友呢？
小倩話：「我睇唔會，我煲劇比較要全神貫注，所以要陪男朋友嘅時候，我就會全心全意咁陪佢，當唔使陪佢嘅時候，我就會專心煲劇，免得兩頭唔到岸。」原來係咁，識到小倩呢啲女朋友，真係無得頂，最後問佢哋煲劇咁耐，學到啲乜嘢呢？
小倩話：「劇集教我做人一定要堅持，永不放棄，其次就係努力，唔努力永遠唔會成功。」至於小芳就話：「我就明白到溝通嘅重要，盡量減少誤會，因為劇中九成嘅恩怨，都係由誤會產生，想生活得開心啲，一定要有良好嘅溝通，減少誤會。」